«Ոչինչ չենք բերել այս աշխարհ եւ ոչինչ էլ չենք կարող տանել այս աշխարհից»:     1 Տիմոթէոս 6, 7         

«Սիրել Աստծուն եւ սիրել մերձաւորին. սա աւելին արժէ՝ քան բոլոր ողջակէզներն ու զոհերը»:   Հմմտ. Մարկոս 12, 33

 «Ամբողջ Օրէնքն իր լիութեամբ ամփոփուած է այս մէկ խօսքի մէջ. Պիտի սիրես»:           
Հմմտ. Գաղատացիս 5, 14

 «Ի՞նչ օգուտ ունի մարդուն ամբողջ աշխարհը շահելը: Ի՞նչ կը տայ մարդը իր կեանքի փոխարէն»:   Հմմտ. Մատթէոս 16, 26

 «Ուզում եմ շատ ու շատ ապրել, Տէր, եթէ Քո կամքը դա է. կամ էլ շուտով ճախրել դէպ'Երկինք, եթէ հաճելի է Քեզ։ Սէրը, հուրն այս երկնային, սպառում է ինձ միշտ։ Ի՞նչ կարեւորութիւն ունեն կեանքն ու մահը. իմ միակ բերկրանքը սէրդ է»։                                               Սբ. Թերեզա    Յիսուս Մանկան
           
 «Նոյնիսկ եթէ մէկը առատութեան մէջ է, իր կեանքը կախում չունի իր ունեցուածքներից»: Հմմտ. Ղուկաս 12, 15
 «Ձեզնից ո՞վ, որքան էլ որ յոգնի, կարող է գոնէ մի ժամ աւելացնել իր կեանքին»: 
Հմմտ. Ղուկաս 12, 25

 «Հնարաւոր չէ բաժանել ճշմարտութիւնը սիրուց։ Աստուած միայն ճշմարտութիւն չէ, այլ նաեւ՝ սէր։ Նա բնակւում է միմիայն սիրուց բխող ճշմարտութեան մէջ»։  Ռոմանո Գուարդինի

 «Դու ասում ես. ''Հարստացել եմ'', բայց չգիտես, որ թշուառ մէկն ես»:  Հմմտ. Յայտնութիւն 3, 17


Եկեղեցու մասին գրուած է. «Քաղաքի պարիսպներն ունեն տասներկու հիմքեր, որոնց վրայ գրուած են տասներկու Առաքեալների անունները»:    Հմմտ. Յայտնութիւն 21, 14

«Կարելի չէ Աստծոյ մասին խօսել սովորութեան ուժով, այլ միմիայն՝ սիրոյ»։

Առաքեալների հաւատքի մասին Յիսուսն ասում է. «Այս ժայռի վրայ կը կառուցեմ իմ Եկեղեցին եւ դժոխքի դռները չեն յաղթի նրան»:  Մատթէոս 16, 18

 «Եւան, սատանայի խօսքերից մոլորուելով, անհնազանդ գտնուեց աստուածային խօսքին եւ հեռացաւ Աստծուց։ Մարիամը, հրեշտակի աւետիսով առաջնորդուելով, հնազանդուեց աստուածային խօսքին եւ արժանացաւ Աստծուն իր արգանդում կրելու։ Եւան համաձայնուեց գայթակղութեանը եւ անհնազանդ գտնուեց. Մարիամը համաձայնուեց Աստծոյ խօսքին եւ հնազանդուեց։ Այդպիսով կոյս Մարիամը կարողացաւ դառնալ կոյս Եւայի փաստաբանը»։                  Սբ. Երանոս Լիոնցի

 «Թող ողորմութիւնն ու հաւատարմութիւնը չպակասեն քեզնից. կապիր դրանք քո պարանոցին, գրիր դրանք քո սրտի լայն տախտակի վրայ, եւ դու շնորհ կը գտնես։ Տիրոջ ու մարդկանց առաջ խորհիր բարու մասին։ Ամբողջ սրտով յոյսդ դիր Աստծոյ վրայ եւ մի՛ հպարտացիր իմաստութեամբդ»։    Առակաց 3, 3-5

Հայր Աստծոյ եւ Յիսուս Քրիստոսի մասին գրուած է. «Նրան, որ նստում է գահի վրայ, եւ Գառանը գովք, պատիւ, փառք եւ իշխանութիւն»:   Յայտնութիւն 5, 13

«Միայն մէկ Աստուած, բոլորի Հայրը, գերիվեր է բոլորից եւ բոլորի մէջ է»:  Հմմտ. Եփեսացիս 4, 6

 «Տէրը մեզ սովորեցնում է միասին աղօթել մեր բոլոր եղբայրների համար։ Յիրաւի, Նա չի ասում Հայր ''իմ'', որ երկնքում ես, այլ՝ Հայր ''մեր'', որպէսզի մեր աղօթքը միայն մէկ սրտից բարձրանայ Եկեղեցու ամբողջ Մարմնի համար»։    Սբ. Յովհան Ոսկեբերան

Յիսուսն ասում է. «Համբառնում եմ իմ Հօր մօտ եւ ձեր Հօր մօտ, իմ Աստծոյ մօտ եւ ձեր Աստծոյ մօտ»:   Յովհաննէս 20, 17

 «Ով սիրում է, չի յոգնում. իսկ եթէ յոգնում է, սիրում է նաեւ յոգնութիւնը»։  Սուրբ Օգոստինոս

Յիսուսն ասում է. «Ահա ես ձեր հետ եմ ամէն օր, մինչեւ աշխարհի վախճանը»:   Մատթէոս 28, 20

 «Քրիստոս Յիսուսը մեր խաղաղութիւնն է, Նա՝ որ երկուսին միայն մէկ դարձրեց»:   Հմմտ. Եփեսացիս 2, 14

 «Քրիստոսը սիրեց Եկեղեցուն եւ նրա համար նուիրեց Իր Անձը, որպէսզի Իր առջեւ կանգնեցնի ամբողջովին փառքով պատուած»:   Հմմտ. Եփեսացիս 5, 25.27

Յաւիտենական կեանքի մասին գրուած է. «Ահա, հասել է Գառան հարսանիքի օրը. Նրա հարսը պատրաստ է, փառահեղ զգեստներ հագած»:   Հմմտ. Յայտնութիւն 19, 7-8

 «Մի՛ ցանկացիր եւ կը լինես աշխարհի ամենահարուստ մարդը»։   Միգէլ Դէ Սերվանտէս

Քրիստոնեաների մասին գրուած է. «Նշանեցի ձեզ մէկ միակ փեսայի, ներկայացնելու համար ձեզ Քրիստոսին որպէս անարատ կոյսեր»:         2 Կորնթացիս 11, 2

Յիսուսի մասին գրուած է. «Քո աթոռն, ո՜վ Աստուած, յաւիտեանս յաւիտենից է»: 
Եբրայեցիս 1, 8

 «Մահուան ենթարկուեցիք ընդմէջ Քրիստոսի մարմնի, պատկանելու համար Նրան՝ ով յարութիւն է առել մեռելներից»:                               Հմմտ. Հռոմէացիս 7, 4

 «Բոլորի կողմից ատուելու էք իմ Անուան պատճառով, բայց ձեր գլխի մազերից մէկն անգամ չի կորչելու»:   Ղուկաս 21, 17-18

 «Բոլոր փորձութիւններում առաւել քան յաղթական ենք, շնորհիւ Նրա՝ ով սիրեց մեզ»:  
Հմմտ. Հռոմէացիս 8, 37

 «Կեանքը մեզ տրուած է Աստծուն փնտրելու, մահը՝ Նրան գտնելու, յաւիտենութիւնը՝ Նրան վայելելու համար»։   Ժաք Նուէ


Յիսուսն ասում է. «Որպէս լոյս եմ եկել աշխարհ, որպէսզի ով հաւատայ ինձ՝ խաւարի մէջ չմնայ»:    Հմմտ. Յովհաննէս 12, 46

                    Ժողովող  (Ե) 

Սատկած ճանճերը ապականում են անուշ իւղերը։ Սակաւ-ինչ իմաստութիւնն աւելի յարգի է, քան մեծ ու անմիտ փառքը։
Իմաստունի սիրտը իր աջ կողմն է, յիմարի սիրտը՝ իր ձախ կողմը։
Երբ յիմարը ճանապարհ գնայ, պիտի երեւայ, որ խելքը պակաս է, եւ ինչի մասին էլ նա մտածի՝ ամբողջն անմտութիւն է։
Եթէ իշխանի զայրոյթը բռնկուի քո դէմ, դու մի՛ լքիր քո տեղը. քաղցր աղաչանքը կարող է կանխել մեծ մեղքերը։

Մի չարիք էլ տեսայ արեգակի ներքոյ, որ ակամայ լինում է իշխանի պատճառով։
Յիմարին բարձր դիրք է տրւում, իսկ հարուստներին ցածր տեղ են նստեցնում։
Ես ծառաներ եմ տեսել, որ ձի հեծած են շրջել, եւ իշխաններ, որոնք երկրի վրայ քայլել են ծառաների նման։
Հոր փորողն ինքը կ՚ընկնի հորի մէջ, ցանկապատ քանդողին կը խայթի օձը։
Քար հանողին քարը վնաս կը տայ, փայտ ճեղքողին՝ փայտից վտանգ կը գայ։Եթէ կացինը բթանայ, եւ մարդը չսրի նրա բերանը, ապա պիտի աւելի շատ ուժեր վատնի, մինչդեռ յաջողութեան մեծ օգուտը իմաստութիւնն է։Եթէ հմայելիս օձը պիտի խայթի, դա առաւելութիւն չէ հմայողի համար։
Իմաստունի բերանում խօսքերը շնորհ են, իսկ յիմարի շրթները կործանում են իրեն։
Նրա խօսքերի սկիզբը յիմարութիւն է, եւ նրա խօսքի վախճանը՝ կատարեալ խենթութիւն։

Յիմարը միայն խօսքերն է շատացնում։ Մարդը չգիտէ, թէ ինչ է եղել եւ ոչ էլ իմանալու է, թէ ինչ է լինելու, քանի որ նրանից յետոյ ո՞վ կարող է պատմել նրան։
Յիմարի աշխատանքը տանջում է իրեն, ինչպէս քաղաքի ճամփան՝ չիմացողին։
Վա՜յ քեզ, քաղա՛ք, որ թագաւորդ մանուկ է, եւ իշխաններդ կերուխում են անում մինչեւ առաւօտ։
Երանի՜ քեզ, երկի՛ր, որ թագաւորդ ազատորդի է, եւ իշխաններդ էլ ուտում են ժամանակին՝ ուժի համար եւ չեն ամաչելու։
Ծուլութեան պատճառով շէնքի գերանները կ՚ընկնեն ցած, եւ ձեռքերի պարապութիւնից տունը կը կաթի։

Հացը տալիս են խնդութեան համար, գինին եւ իւղն ուրախացնում են ապրողներին, բայց արծաթն է լուծում ամէն բան։
Սակայն դու քո մտքում անգամ մի՛ նզովիր թագաւորին եւ քո ննջարանում էլ մի՛ անիծիր մեծաւորին, որովհետեւ երկնքի թռչունները ձայնդ կը տանեն, եւ թեւաւորները կը յայտնեն քո խօսքը։

Հացդ ջրի՛ն տուր՝ թող տանի, շատ օրեր անց պիտի նորից գտնես այն։
Բաժի՛ն տուր եօթին էլ, ութին էլ, որովհետեւ ի՞նչ իմանաս, թէ ի՛նչ չարիք պիտի լինի երկրի վրայ։

Երբ ամպերը լցւում են անձրեւով, այն թափում են երկրի վրայ, բայց երբ ծառն ընկնում է դէպի հարաւ կամ դէպի հիւսիս, ուր էլ ընկնի՝ այնտեղ էլ պիտի մնայ։
Քամուն նայողը սերմ չի ցանի, ամպին նայողը հունձ չի անի։
Ի՞նչ իմանաս՝ ո՛րն է քամու ճանապարհը։ Ինչպէս որ չգիտես, թէ ինչպէս են յղի կնոջ արգանդում ոսկորներ գոյանում, այնպէս էլ չես կարող իմանալ Աստծու բոլոր գործերը։
Առաւօտեան քո սերմը կը ցանես, բայց երեկոյեան էլ ձեռքդ պարապ չթողնես, որովհետեւ չգիտես, թէ ո՛րը յաջող կը լինի՝ սա՞, թէ՞ նա, կամ գուցէ երկուսն էլ լաւ լինեն միասին։
Քաղցր է լոյսը, եւ աչքի համար հաճելի է արեգակը տեսնել,
որովհետեւ եթէ մարդ բազում տարիներ էլ ապրի եւ այդ բոլոր տարիներին էլ ուրախ լինի, պիտի յիշի նաեւ խաւարի այն օրերը, որոնք խիստ շատ են լինելու, քանզի այն ամէնը, որ յետոյ է գալու, ունայնութիւն է։

Ուրախացի՛ր, երիտասա՛րդ, քո երիտասարդութեամբ, թող սիրտդ քեզ զուարճացնի քո երիտասարդ օրերին։Գնա՛ քո սրտի անբիծ ճանապարհով եւ քո աչքերի տենչանքով, բայց եւ իմացի՛ր, որ այս բոլորի համար Աստուած պիտի քեզ դատաստանի ենթարկի։
Եւ քո սրտից հեռո՛ւ վանիր տրտմութիւնը եւ չարութիւնը հանի՛ր քո մարմնից, որովհետեւ թէ՛ երիտասարդութիւնը եւ թէ՛ յիմարութիւնը ունայնութիւն են։

Յիշի՛ր քո Արարչին քո երիտասարդութեան օրերին, քանի դեռ չեն եկել դառնութեան օրերը, եւ չեն հասել այն տարիները, որոնց մասին պիտի ասես. «Կեանքից այլեւս հաճոյք չեմ զգում»,
քանի դեռ քեզ համար չեն խաւարել արեգակն ու լոյսը եւ լուսինն ու աստղերը, քանի դեռ ամպերը չեն վերադարձել անձրեւից յետոյ,
որովհետեւ քեզ համար էլ է գալու այն օրը, երբ քո տան պահապանները պիտի երերան, պիտի կքեն զօրաւոր այրերը, պիտի պակասեն եւ դատարկ մնան աղօրիքները, պիտի խաւարեն անցքերից նայողները,ու երբ աղօրիքի ձայնը
տկարանայ, պիտի փակուեն փողոցների դռները, պիտի զարթնես աքլորականչից առաջ, եւ պիտի նկուն լինեն երգող աղջիկները,
պիտի նայեն բարձունքներին եւ սարսափեն ճանապարհից։ Պիտի ծաղկի նշենին, ու մորեխը պիտի բազմանայ, կապարը պիտի տարածուի, որովհետեւ մարդը գնաց իր յաւիտենական տունը. հրապարակներում պիտի բոլորուեն նրա շուրջը լացուկոծ անողները։

Եւ մինչ արծաթի լարը կը կտրուի, եւ կը քանդուի ոսկի մանեակը, մինչ սափորը կը փշրուի աղբիւրի ճանապարհին, եւ կը կոտրուի ջրհորի անիւը,նրա աճիւնը, ինչպէս որ հող էր, հող պիտի դառնայ, եւ հոգին, որ Աստուած էր տուել, պիտի վերստին նրա մօտ գնայ։
Ունայնութիւն ունայնութեանց, - ասաց Ժողովողը, - ամէն ինչ ունայն է։
Եւ այսպիսով Ժողովողը ոչ միայն դարձաւ աւելի իմաստուն,
այլեւ նա գիտութիւն սովորեցրեց ժողովրդին, քանի որ ականջի համար հաճելի է խրատի գեղեցկութիւնը։
Ժողովողը շատ որոնեց, որ ցանկալի խօսքեր գտնի, գրի ճշմարիտ խօսքերի ուսանելի մի գիրք։
Իմաստունների խօսքերը նման են եզների խթանի կամ մեծաւորի տուած մուրհակի վրայ խփած կնիքի։

Մի խօսք եւս, որդեա՛կ իմ. զգուշացի՛ր շատ գրքեր ունենալուց, որովհետեւ նրանք վերջ չունեն, եւ շատ կարդալը մարմնի համար յոգնութիւն է։

Եւ ահա լսի՛ր իմ բոլոր խօսքերի վերջաբանը. վախեցի՛ր Աստծուց եւ պահի՛ր նրա պատուիրանները. ահա այս է մարդն ամբողջովին,
որովհետեւ Աստուած պիտի բոլոր արարածների դատաստանն անի նրանց կատարած բոլոր թաքուն գործերի համար՝ լինեն դրանք չար թէ բարի։